ໃນວັນທີ 16 ພະຈິກ 2022, ຕຳຫຼວດເມືອງເຄວຟອງ ແຂວງເຫງະອານ ສສ ຫວຽດນາມ ໃຫ້ຮູ້ວ່າ: ໄດ້ປະຕິບັດຕາມຄຳສັ່ງຂອງ ເຈົ້າໜ້າທີ່ຕຳຫຼວດ ແຂວງເຫງະອານ ເປີດປະຕິບັດການບຸກປາບປາມອາດຊະຍາກຳ ເພື່ອຮັບປະກັນຄວາມສະຫງົບປອດໄພ ໃນລະຫວ່າງວັນທີ 14 ແລະ 15 ພະຈິກ 2022, ທາງເຈົ້າໜ້າທີ່ ປກສ ເມືອງເຄວຟອງ ສາມາດຈັບຕົວຜູ້ຄ້າຂາຍຢາເສບຕິດ ໄດ້ຈຳນວນ 4 ຄົນ.
ໜຶ່ງໃນນັ້ນມີຜູ້ຖືກຈັບຕົວ ຄື: ທ້າວ ໂລວັນຕວນ, ຊື່ຫຼິ້ນ ຕວນ, ເກີດປີ 1978, ຢູ່ບ້ານແທງຟອງ, ເມືອງເຄວຟອງ, ເຊິ່ງຜູ້ກ່ຽວຕິດຢາເສບຕິດໜັກ ແລະ ເຄີຍຖືກຕັດສິນລົງໂທດຄະດີຢາເສບຕິດມາແລ້ວ 2 ຄັ້ງ, ຄັ້ງສຸດທ້າຍ ແມ່ນອອກຈາກຄຸກໃນປີ 2018. ພາຍຫຼັງພົ້ນໂທດມາບໍ່ໄດ້ດົນ, ທ້າວ ຕວນ ຖືກຊັກຈູງໃຊ້ຢາເສບຕິດ ແລະ ຊັກຊວນມາຄ້າຢາອີກ.
ເນື່ອງຈາກສະພາບຄອບຄົວທຸກຍາກ ບວກກັບຂີ້ຄ້ານເຮັດວຽກ ແລະ ບໍ່ມີເງິນ, ຜູ້ກ່ຽວຈຶ່ງໄດ້ໄປຕິດຕໍ່ຊື້ຢາເສບຕິດຢູ່ອີກຟາກຊາຍແດນ ໂດຍທັງເສບ ແລະ ຂາຍເອົາກຳໄລ.
ເມື່ອຕຳຫຼວດແຂວງເຫງະອານ ປະຕິບັດໜ້າທີ່ຕາມໂຄງການທີ່ວ່າ: ” ຊຸມຊົນຊາຍແດນປອດຢາເສບຕິດ “, ຜູ້ຄ້າຂາຍຢາເສບຕິດຫຼາຍຄົນ ກໍຖືກຈັບ, ສ່ວນ ທ້າວ ຕວນ ກໍລີ້ຢູ່ເຂດຫ່າງໄກສອກຫຼີກຕາມຊາຍແດນ ເພື່ອລໍຖ້າໂອກາດດຳເນີນການຂາຍຢາເສບຕິດ.
ມາເຖິງໃນຕອນຄ່ຳວັນທີ 14 ພະຈິກ, ຕຳຫຼວດເມືອງເຄວຟອງ ໄດ້ຈັບຕົວ ທ້າວ ຟານວັນທຽນ ເຊິ່ງແມ່ນລູກຄ້າປະຈຳຂອງ ທ້າວ ຕວນ, ອາໄສຢູ່ບ້ານມິນຕ້ຽນ ເມືອງກຸ້ຍໂຈ່ວ ແຂວງເຫງະອານ ພ້ອມດ້ວຍຂອງກາງຢາເສບຕິດ ປະເພດເຮໂຣອິນ 3,61 ກຼາມ.
ຜ່ານການສຶບສວນ-ສອບສວນ, ທ້າວ ຟານວັນທຽນ ໄດ້ໃຫ້ການຕໍ່ເຈົ້າໜ້າທີ່ ພ້ອມຊັກທອດເຖິງ ທ້າວ ຕວນ ໃນວັນທີ 15 ພະຈິກ 2022.
ສະນັ້ນ, ເຈົ້າໜ້າທີ່ຕຳຫຼວດສືບສວນ-ສອບສວນຂອງເມືອງ ໄດ້ດຳເນີນການຊອກຄົ້ນຫາຢ່າງຮີບດ່ວນ ແລະ ຈັບຕົວ ທ້າວ ຕວນ ທີ່ກ່ຽວຂ້ອງກັບການຄ້າຂາຍຢາເສບຕິດ ແລະ ໄດ້ເຂົ້າກວດຄົ້ນເຮືອນຜູ້ກ່ຽວ ພ້ອມຢຶດຂອງກາງຢາບ້າ ຈຳນວນ 35 ເມັດ, ເຮໂຣອິນ 0,87 ກຼາມ, ເງິນສົດ ແລະ ໂທລະສັບມືຖືຈໍານວນໜຶ່ງ.
ສຳລັບວິທີການຄ້າຂາຍຢາເສບຕິດຂອງ ທ້າວ ຕວນ ແມ່ນຂ້ອນຂ້າງຊັບຊ້ອນ ເນື່ອງຈາກຜູ້ກ່ຽວສວຍໂອກາດອາໄສຢູ່ເຂດພູດອຍ ເຊັ່ນ:ທ້າວ ຕວນ ຈະບໍ່ເຊື່ອງຢາເສບຕິດໄວ້ໃນເຮືອນ, ແຕ່ໄດ້ຂຸດຂຸມຝັງຢາເສບຕິດຢູ່ເທິງພູສູງຫຼັງເຮືອນ ແລະ ເມື່ອມີລູກຄ້າມາຊື້, ຈຶ່ງໃຊ້ຂັ້ນໄດປີນຂຶ້ນໄປເອົາມາຂາຍ
ການຈັບກຸມ ທ້າວ ຕວນ ໄດ້ຮັບຜົນສຳເລັດ, ເຊິ່ງໄດ້ຮັບການສະໜັບສະໜູນຈາກປະຊາຊົນໃນທ້ອງຖິ່ນ ຈຶ່ງສາມາດລົບລ້າງຈຸດຄ້າຂາຍຢາເສບຕິດທີ່ສັບສົນຢູ່ເຂດດັ່ງກ່າວໄດ້.
ພ້ອມນີ້, ຕຳຫຼວດຕາແສງເຄວຟອງ ຍັງຈັບຕົວ ທ້າວ ຮ່ວາງວັນຕຽວ (ເກີດປີ 2000, ຢູ່ບ້ານມອນ, ເມືອງກວຍເຈົາ, ແຂວງເຫງະອານ) ໃນຂໍ້ຫາຄອບຄອງດ້ວຍຢາເສບຕິດ ປະເພດເຮໂຣອິນ 3,4 ກຼາມ.
ນອກນັ້ນ, ໃນເວລາດຽວກັນ ທີມເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງເຄວຟອງ ຍັງຈັບຕົວໄດ້ເພີ່ມອີກໜຶ່ງຄົນຊື່ ທ້າວ ເລວັນລວນ ຢູ່ບ້ານແທ່ງຟອງ 2, ໃນຂໍ້ຫາມີຢາເສບຕິດໄວ້ໃນຄອບຄອງ ໂດຍຢຶດໄດ້ເຮໂຣອິນ ຈຳນວນ 24,59 ກຼາມ.
