ປະຊາຊົນບ້ານໂນນຮັງ ມີລາຍຮັບຈາກການຜະລິດເຂົ້າເໝົ້າຂາຍ ສະເລ່ຍບໍ່ຕໍ່າກວ່າ 50 ລ້ານ

0
107

ເມື່ອກ້າວເຂົ້າສູ່ລະດູການເກັບກ່ຽວເຂົ້ານາປີ ຫຼາຍບ້ານ ກໍຄື ຫຼາຍຄອບຄົວ ກໍໄດ້ລົງມືເກັບກ່ຽວເຂົ້າແລ້ວ, ແຕ່ກໍມີບາງສ່ວນທີ່ຍັງບໍ່ທັນເກັບກ່ຽວ ເນື່ອງຈາກເຂົ້າຍັງບໍ່ທັນສຸກເຕັມທີ່. ດັ່ງນັ້ນ, ເພື່ອລໍຖ້າການເກັບກ່ຽວເຂົ້າ ປະຊາຊົນຫຼາຍບ້ານກໍຫັນມາເຮັດເຂົ້າເໝົ້າ ເພື່ອຈໍາໜ່າຍເປັນສິນຄ້າ ເປັນຕົ້ນແມ່ນ ປະຊາຊົນບ້ານໂນນຮັງ ເມືອງຈໍາພອນ ແຂວງສະຫວັນນະເຂດ, ເຊິ່ງມີຊື່ສຽງມາແຕ່ດົນນານແລ້ວ ໃນເລື່ອງຂອງການເຮັດເຂົ້າເໝົ້າຂາຍ ແລະ ກໍເປັນອີກອາຊີບໜຶ່ງທີ່ພາໃຫ້ປະຊາຊົນຊາວໄຮ່ນາ ສາມາດຫຼຸດພົ້ນອອກຈາກຄວາມທຸກຍາກ ໂດຍສະເລ່ຍລາຍຮັບຄອບຄົວໜຶ່ງບໍ່ຕ່ຳກວ່າ 50 ລ້ານກີບຕໍ່ປີ.

ທ່ານ ສຸວັນນະ ໄຊຍະວົງສາ ນາຍບ້ານໂນນຮັງ ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນມານີ້ ວ່າ:

ບ້ານໂນນຮັງ ມີປະຊາກອນທັງໝົດ ຈໍານວນ 1.117 ຄົນ ຍິງ 654 ຄົນ, ມີ 131 ຄອບຄົວ, ປະຊາຊົນສ່ວນໃຫຍ່ມີອາຊີບປູກຝັງ-ລ້ຽງສັດ ເປັນຕົ້ນຕໍ; ການຜະລິດເຂົ້າເໝົ້າ ແມ່ນເປັນສິນຄ້າປະຈໍາບ້ານອີກຢ່າງໜຶ່ງທີ່ປະຊາຊົນພວມເຮັດການຜະລິດເປັນສິນຄ້າ ເຊິ່ງມີຈໍານວນ 50 ກວ່າຄອບຄົວໄດ້ເຮັດການຜະລິດເຂົ້າເໝົ້າ.

ໃນການຜະລິດເຂົ້້າເໝົ້າ ແມ່ນໄດ້ແບ່ງອອກເປັນ 2 ໄລຍະ ຄື: ນັບແຕ່ທ້າຍເດືອນສິງຫາ ຫາ ຕົ້ນເດືອນພະຈິກ (ເຂົ້ານາປີ) ແລະ ເດືອນມີນາ ຫາ ເດືອນເມສາ (ເຂົ້ານາແຊງ). ປັດຈຸບັນ, ເຫັນວ່າ ຄວາມຮຽກຮ້ອງຕ້ອງການເຂົ້າເໝົ້າຕາມທ້ອງຕະຫຼາດ ແມ່ນມີສູງ ແລະ ມີລາຄາດີກວ່າປີກ່ອນຫຼາຍ ເນື່ອງຈາກວ່າເຂົ້າໃນປີນີ້ມີລາຄາສູງຂຶ້ນ, ນໍ້າມັນມີລາຄາແພງ, ເກີດໄພແຫ້ງແລ້ງນໍ້າບໍ່ພຽງພໍ ໃນການປັກດໍາເຂົ້ານາປີ ສົ່ງຜົນໃຫ້ເຂົ້າມີຜົນຜະລິດໜ້ອຍ; ດັ່ງນັ້ນ, ເຂົ້າຈຶ່ງບໍ່ພຽງພໍຕໍ່ຄວາມຕ້ອງການ ໃນການຜະລິດເຂົ້າເໝົ້າ.

ທ້າວ ແອ່ງ ແລະ ນາງ ແຫຼ້ ໄຊຍະເສນ ອາຊີບຊາວນາ ປະຊາຊົນບ້ານໂນນຮັງ ຜູ້ທີ່ເຮັດການຜະລິດເຂົ້າເໝົ້າຕົວຈິງ ກ່າວວ່າ:

ສໍາລັບການຜະລິດເຂົ້າເໝົ້າ ໃນປີນີ້ ແມ່ນສາມາດເວົ້າໄດ້ວ່າມີລາຄາດີຫຼາຍ ເນື່ອງຈາກວ່າຕະຫຼາດມີຄວາມຕ້ອງການສູງ ໂດຍມີລາຄາ 40.000 ກີບຕໍ່ກິໂລກຼາມ; ເຊິ່ງສະເລ່ຍລາຍຮັບພາຍໃນປີ 2022 ແມ່ນສາມາດຂາຍໄດ້ເກືອບ 50 ລ້ານກີບ, ຖ້າທຽບໃສ່ປີກ່ອນ ມີລາຍຮັບພຽງແຕ່ 10-20 ລ້ານກີບເທົ່ານັ້ນ.

ເຖິງແມ່ນວ່າຈະມີລາຍຮັບສູງຂຶ້ນກວ່າປີກ່ອນ ແຕ່ກໍມີຂໍ້ຫຍຸ້ງຍາກຫຼາຍດ້ານ ເປັນຕົ້ນແມ່ນ ຕົ້ນທຶນການຊື້ເຂົ້າສູງຂຶ້ນເຖິງ 5.000 ກີບຕໍ່ກິໂລກຼາມ, ເຂົ້າເປືອກບໍ່ພຽງພໍກັບຄວາມຕ້ອງການ ແລະ ອື່ນໆ.

ນາງ ແຫຼ້ ໄຊຍະເສນ ຍັງເວົ້າຕື່ມອີກ ວ່າ: ພາຍຫຼັງທີ່ຫັນມາຜະລິດເຂົ້າເໝົ້າຂາຍ ເຫັນໄດ້ວ່າ ຊີວິດການເປັນຢູ່ຂອງຄອບຄົວດີຂຶ້ນຫຼາຍ ເມື່ອທຽບໃສ່ກັບເມື່ອກ່ອນ.

ໂອກາດດັ່ງກ່າວ, ທາງອໍານາດການປົກຄອງບ້ານ ກໍຄື ປະຊາຊົນບ້ານໂນນຮັງ ກໍໄດ້ຮຽກຮ້ອງມາຍັງອໍານາດການປົກຄອງແຕ່ລະຂັ້ນພາຍໃນແຂວງ ຈົ່ງໃຫ້ການຊ່ວຍເຫຼືອໃນການກໍ່ສ້າງຊົນລະປະທານ ເພື່ອກັກເກັບນໍ້າໄວ້ຜະລິດເຂົ້ານາປີ ກໍຄື ນາແຊງ. ທັງນີ້, ກໍເພື່ອໃຫ້ສາມາດຜະລິດເຂົ້າເໝົ້າໃຫ້ພຽງພໍຕໍ່ກັບຄວາມຕ້ອງ ການຂອງຕະຫຼາດໄດ້.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.