ປີ 2022 ວຽກງານການເງິນຍັງມີທ່າແຮງບົ່ມຊ້ອນຂອງການເກັບງົບປະມານແຫ່ງລັດ ແລະ ການຮົ່ວໄຫລໃນຫລາຍຂອດຂັ້ນ

0
31

ວັນທີ 20 ທັນວາ 2022 ນີ້, ກະຊວງການເງິນ ໄດ້ຈັດກອງປະຊຸມສະຫລຸບວຽກງານການເງິນ ທົ່ວປະເທດ ປະຈຳປີ 2022 ແລະ ທິດທາງປີ 2023 ຢູ່ສູນຝຶກອົບຮົມ ແລະ ການຮ່ວມມືສາກົນ (ICTC) ໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີບັນດາຮອງລັດຖະມົນຕີ, ຫົວໜ້າກົມ, ຮອງຫົວໜ້າກົມ ແລະ ພະນັກງານກະຊວງການເງິນເຂົ້າຮ່ວມ.

ທ່ານ ລັດຖະມົນຕີກະຊວງການເງິນ ກ່າວວ່າ: ເພື່ອໄດ້ຕີລາຄາສະພາບການຈັດຕັ້ງປະຕິບັດແຜນງົບປະມານແຫ່ງລັດປີ 2022 ເປັນຕົ້ນແມ່ນການຂຸດຄົ້ນທ່າແຮງບົ່ມຊ້ອນໃນການເກັບເຂົ້າງົບປະມານແຫ່ງລັດຢ່າງພາວະວິໄສ, ຕ້ອງຮັບຮູ້ ແລະ ກ້າຮັບຜິດຊອບຕໍ່ຜົນສຳເລັດ, ກ້າຕໍານິສິ່ງທີ່ພວກເຮົາເຮັດບໍ່ໄດ້ດີ ເຮັດໃຫ້ເກັບລາຍຮັບບໍ່ຄົບຖ້ວນ, ເກັບ

ແລ້ວບໍ່ມອບ, ຮົ່ວໄຫລໃນຫລາຍຂອດຂັ້ນ, ຫລາຍຂົງເຂດທີ່ຍັງສະສົມມາບໍ່ໄດ້ຖືກແກ້ໄຂ; ເກັບລາຍຮັບບໍ່ສົມຄູ່ກັບທ່າແຮງບົ່ມຊ້ອນເປັນຕົ້ນແມ່ນໃນຂົງເຂດຊັບພະຍາກອນທຳມະຊາດ, ແຮ່ທາດ, ພະລັງງານ, ການນຳເຂົ້ານໍ້າມັນເຊື້ອໄຟ, ອຸປະກອນກໍ່ສ້າງ, ເຄື່ອງໄຊ້ໄຟຟ້າ, ອຸປະໂພກ-ບໍລິໂພກ ແລະ ອື່ນໆ ແລະ ຕ້ອງໄດ້ຕີລາຄາຢ່າງມີ

ຄວາມຮັບຜິດຊອບສູງ ເພື່ອເຫັນໄດ້ບັນຫາທີ່ເຮົາຕ້ອງຕັດສິນໃຈເດັດຂາດແກ້ໄຂ, ພ້ອມທັງຂຸດຄົ້ນທຸກທ່າແຮງບົ່ມຊ້ອນຖານລາຍຮັບໃຫ້ໄດ້ເພີ່ມຂຶ້ນຢ່າງຈະແຈ້ງຊັດເຈນ; ຄວາມຈໍາເປັນໃນການຜັນຂະຫຍາຍ ແລະ ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ເປັນບັນຫາສະສົມມາຢ່າງຍາວ

ນານບໍ່ທັນໄດ້ຮັບການແກ້ໄຂບັນຫາໜີ້ສິນສາທາລະນະພາຍໃນ ແລະ ຕ່າງປະເທດ ສູງເກີນຄວາມສາມາດທີ່ຈະແກ້ໄຂໄດ້ໃນໄລຍະສັ້ນ, ບັນຫາການລະເມີດວິໄນການເງິນ, ການອັດຊ່ອງວ່າງການຮົ່ວໄຫລການຂຸດຄົ້ນທຸກແຫລ່ງລາຍຮັບທີ່ບົ່ມຊ້ອນ; ເພື່ອສ້າງລາຍຮັບພາຍໃນໃຫ້ເພີ່ມຂຶ້ນຕາມທ່າແຮງທີ່ມີ ແລະ ສະພາບການຮົ່ວໄຫລການເກັບລາຍຮັບຍັງ

ເກີດຂຶ້ນຢ່າງແຜ່ລາມ, ການປະຕິບັດ ແລະ ຕ້ານການຟຸ່ມເຟືອຍເພື່ອຫລຸດຜ່ອນການຂາດດຸນງົບປະມານ, ການລະດົມທຶນ ເພື່ອການພັດທະນາ ແລະ ດຸ່ນດ່ຽງງົບປະມານ ທັງໝົດນັ້ນ ເປັນບັນຫາພື້ນຖານທີ່ເຫັນວ່າ ໝົດທຸກພາກສ່ວນຂະແໜງການສູນກາງ, ທ້ອງຖິ່ນ ແລະ ທົ່ວສັງຄົມຕ້ອງໄດ້ເຂົ້າຮ່ວມຕາມພາລະບົດບາດ ເພື່ອໃຫ້ມີສ່ວນຮ່ວມຂອງທຸກພາກສ່ວນ ເສດຖະກິດ-ສັງຄົມໃນການແກ້ໄຂບັນຫາ.

ສໍາລັບທິດທາງແຜນການປະຈໍາປີ 2023 ແນໃສ່ສ້າງພື້ນຖານຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ, ຕ້ອງສົມທົບຢ່າງແໜ້ນແຟ້ນລະຫວ່າງຂະແໜງສູນກາງ ແລະ ທ້ອງຖິ່ນໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ໜີ້ສິນສາທາລະນະ, ຈຳກັດຄວາມສ່ຽງບໍ່ໃຫ້ສູ່ສະພາວະວິກິດການທາງດ້ານ

ເສດຖະກິດ-ການເງິນຮ້າຍແຮງ, ບໍ່ໃຫ້ຕົກຢູ່ໃນປະເທດທີ່ບໍ່ສາມາດຊໍາລະໜີ້ສິນໄດ້ ແລະ ຮັບປະກັນການສ້າງບັນດາປັດໄຈທີ່ຈຳເປັນໃຫ້ແກ່ການຂະຫຍາຍຕົວທາງດ້ານ
ເສດຖະກິດ-ສັງຄົມຢ່າງຕໍ່ເນື່ອງ; ຍົກສູງຄວາມສາມາດ ແລະ ສ້າງຄວາມເຂັ້ມແຂງໃຫ້ແກ່ການຄຸ້ມຄອງການເງິນມະຫາພາກໃຫ້ມີຄວາມເຂັ້ມແຂງເທື່ອລະກ້າວ.

ພ້ອມດຽວກັນນີ້, ໃນກອງປະຊຸມດັ່ງກ່າວຍັງຈະໄດ້ພ້ອມກັນຄົ້ນຄວ້າ, ຕີລາຄາບັນຫາທີ່ສໍາຄັນຂອງຂະແໜງການເງິນຕາມການແບ່ງຄວາມຮັບຜິດຊອບໃຫ້ສະມາຊິກລັດຖະບານ, ອົງການປົກຄອງທ້ອງຖິ່ນຕິດພັນກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ຕີລາຄາວຽກງານການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ອື່ນໆ.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.