ໂຮງໝໍສູນກາງ 103 ກອງທັບ ມີເຄື່ອງມືປິ່ນປົວ ທັນສະໄໝ ສາມາດຜ່າຕັດຜ່ານທໍ່ ໄດ້ຫລາຍພະຍາດ

0
50

ຂປລ. ທ່ານ ພັທ ດຣ ປານ ພິລາວົງ ຮອງອຳນວຍການ, ຮັບຜິດຊອບວຽກງານປິ່ນປົວສາຍພາຍນອກ ໂຮງໝໍສູນກາງ 103 ກອງທັບປະຊາຊົນລາວ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ໃນວັນທີ 9 ມັງກອນ 2023 ນີ້ວ່າ: ວຽກງານສາຍພາຍນອກ ໂຮງໝໍສູນກາງ 103 ກອງທັບປະ ຊາຊົນລາວ ເປັນວຽກງານໜຶ່ງທີ່

ສໍາຄັນ ແລະ ຈຳເປັນ ທັງມີຄວາມຫຍຸ້ງຍາກ ແລະ ມີຄວາມຮັບຜິດ ຊອບສູງ, ເປັນວຽກທີ່ຕັດສິນປີ່ນປົວຄົນ, ຜ່າຕັດ ດ້ວຍເຕັກນິກ ແລະ ວິຊາການທີ່ແນ່ນອນ ຖ້າມີຄວາມຜິດພາດໄປ ກໍມີຜົນສະທ້ອນເຖິງຊີວິດຂອງຄົນເຈັບ ໂດຍໄດ້ຮັບຄວາມຊ່ວຍເຫລືອ ນໍາພາ-ຊີ້ນຳຈາກການຈັດຕັ້ງຂັ້ນເທິງ ພວກເຮົາໄດ້ສຸມທຸກສະຕິປັນຍາ ເຫື່ອ

ແຮງ, ມີຄວາມເປັນເອກະພາບກັນໃນໝູ່ຄະນະ ນຳພາພະນັກງານແພດໝໍທັງໝົດ ໃຫ້ມີແນວຄິດຫລັກໝັ້ນໜັກແໜ້ນ ເອົາໃຈໃສ່ປະຕິບັດໜ້າທີ່ການເມືອງຂອງຕົນ ໂດຍສະເພາະ ວຽກປິ່ນປົວຜ່າຕັດ ໃຫ້ໄດ້ຮັບຜົນດີ, ໄດ້ຮັບຄວາມເຊື່ອໝັ້ນຈາກຄົນເຈັບ ແລະ ຄອບຄົວຄົນເຈັບ.

ທ່ານ ພັທ ດຣ ປານ ພິລາວົງ ຍັງໃຫ້ຮູ້ວ່າ: ກ່ອນປີ 2008 ໂຮງໝໍສູນກາງ 103 ກອງທັບ ມີແຕ່ ການຜ່າຕັດເປີດບາດແຜ ທຸກກໍລະນີໃນການຜ່າຕັດ, ແຕ່ຍ້ອນຄວາມເອົາໃຈໃສ່ຂອງຂັ້ນເທິງ ນັບແຕ່ປີ 2008 ມາຮອດປັດຈຸບັນ, ພວກເຮົາມີເຄື່ອງມືການແພດທີ່ທັນສະໄໝ, ມີເຄື່ອງຜ່າຕັດຜ່ານທໍ່ ແລະ ສາ ມາດຜ່າຕັດຜ່ານທໍ່ໄດ້ຫລາຍ

ພະຍາດເຊັ່ນ: ຜ່າຕັດຖົງບີ, ຕັດໄສ້ຕິ່ງ, ຫຍິບກະເພາະຊອດ ແລະ ກວດກາໃນຜົ້ງທ້ອງ, ສະຫລາຍໜິ້ວພົກ ຍ່ຽວ ແລະ ທໍ່ສົ່ງໄຂ່ຫລັງ, ຂູດຕ່ອມລູກໝາກໃຫຍ່, ຂູດຕັດຕິ່ງ ຫລື ກ້ອນເບົ້າໃນພົກຍ່ຽວທີ່ຂະໜາດບໍ່ໃຫຍ່ຫລາຍ, ຜ່າຕັດຍົກມົດລູກ, ກ້ອນເບົ້າຮັງໄຂ, ລູກນອກພົກ, ພະແນກຜ່າຕັດຜົ້ງເອິກສາມາດ ລອກລ້າງເຫຍື່ອຫຸ້ມປອດ

ຕິດເປັນໜອງ, ເຫຍື່ອຫຸ້ມປອດຊອດ,ສາ ມາດປົວແປງຄໍ່ກະດູກຫົວເຂົ່າ, ຕັດກ້ອນລູກໜູໃນຄໍ່ຫົວເຂົ່າ, ແປງເອັນຄໍ່ຫົວເຂົ່າ, ຕໍ່ເສັ້ນເລືອດ ແລະ ເສັ້ນປະສາດດ້ວຍກ້ອງຂະຫຍາຍ, ສາມາດຜ່າຕັດກ້ອນເບົ້າສະໝອງຜ່ານກ້ອງຂະຫຍາຍ. ນອກນັ້ນຍັງມີການຜ່າຕັດເປີດບາດ ແຜບັນດາພະຍາດພາຍນອກທົ່ວໄປ, ຜ່າຕັດເສີມສວຍ

ຕົບແຕ່ງ ແລະ ອື່ນໆ.ພິເສດ ໃນວັນທີ 31 ທັນວາ 2022 ຜ່ານມາ, ໂຮງໝໍສູນກາງ 103 ກອງທັບ ພວກເຮົາສາມາດຜ່າຕັດປູກຖ່າຍໄຂ່ຫລັງໄດ້ສຳເລັດ ຈໍານວນ 2 ກໍລະນີ ຊຶ່ງເປັນກໍລະນີທຳອິດ ແລະ ຄັ້ງທຳອິດໃນຜ່າຕັດປູກຖ່າຍໄຂ່ຫລັງ ຢູ່ ສປປ ລາວ.

ແຕ່ເຖິງຢ່າງໃດກໍຕາມ, ການປະຕິບັດໜ້າທີ່ວຽກງານ ການປິ່ນປົວຜ່າຕັດຢູ່ໂຮງໝໍ 103 ຍັງມີບາງດ້ານຫຍຸ້ງຍາກ, ມີຄວາມຈຳເປັນ ແລະ ຄວາມຕ້ອງການບາງບັນຫາ ເປັນຕົ້ນ ພະນັກງານແພດໝໍຍັງບໍ່ພຽງພໍກັບໜ້າວຽກຕົວຈິງ, ອຸປະກອນ ເຄື່ອງມືການແພດຍັງບໍ່ພຽງພໍ ແລະ ບໍ່ທັນຕອບສະໜອງໄດ້ຕາມຄວາມຮຽກຮ້ອງຕ້ອງການໃນການປິ່ນປົວປົວປັດຈຸບັນ ໂດຍສະເພາະແມ່ນ ອຸບປະກອນ, ເຄື່ອງມືການແພດທີ່ຮັບໃຊ້ເຂົ້າໃນວຽກງານ ການຜ່າຕັດປູກຖ່າຍໄຂ່ຫລັງ.

ທ່ານ ພັທ ດຣ ປານ ພິລາວົງ ຍັງກ່າວຕື່ມວ່າ: ເນື່ອງໃນໂອກາດຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວຄົບຮອບ 74 ປີ (20/1/1949-20/1/2023) ຂໍສະແດງຄວາມຮູ້ບຸນຄຸນອັນໃຫຍ່ຫລວງມາຍັງການນຳພັກ-ລັດ ໂດຍສະເພາະ ການນໍາຂອງກະຊວງປ້ອງກັນປະເທດ ທີ່ໄດ້ເປັນຫ່ວງເປັນໄຍ ແລະ ໃຫ້ໂອກາດ ສ້າງໂຮງໝໍສູນກາງ 103 ແຫ່ງນີ້ໃຫ້ມີຄວາມເຕີບໃຫຍ່ຂະຫຍາຍຕົວ, ມີຄວາມເຂັ້ມແຂງ ແລະ ທັນສະໄໝມາເຖິງປັດຈຸບັນນີ້.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.