ປະກົດການໃໝ່ ໂຮງງານກັ່ນນ້ຳມັນຍອດງື່ມພາວເວີ ສາມາດປຸງແຕ່ງນ້ຳມັນໄດ້ແລ້ວ 10 ລ້ານລິດຕໍ່ເດືອນ

0
173

ການລົງເຄື່ອນໄຫວຊຸກຍູ້ ແລະ ເບິ່ງການປຸງແຕ່ງນໍ້າມັນຢູ່ໂຮງງານປຸງແຕ່ງນໍ້າມັນຂອງບໍລິສັດຍອດງື່ມພາວເວີມະຫາຊົນ ຂອງ​ ທ່ານ ມະໄລທອງ ກົມມະສິດລັດຖະມັນຕີກະຊວງອຸດສາຫະກໍາ ແລະ ການຄ້າ​ ພ້ອມຄະນະໄດ້ມີຂຶ້ນໃນວັນທີ 16 ມັງກອນ 2023 ນີ້ ທີ່ໂຮງງານປຸງແຕ່ງນໍ້າມັນຂອງບໍລິສັດ ຍອດງື່ມພາວເວີມະຫາຊົນ ໂດຍມີ ທ່ານ ບຸນໂຮມ ເທດທານີ ສະມາຊິກສະພາແຫ່ງຊາດເຂດ 9 ປະທານສະພາປະຊາຊົນແຂວງ ແຂວງຊຽງຂວາງ,​ ທ່ານ ທອງສະຫວັດ ມັງໜໍ່ເມກ ຫົວໜ້າພະແນກ ອຸດສາຫະກຳ ແລະ ການຄ້າແຂວງ ມີພະນັກງານວິຊາການທີ່ກ່ຽວຂ້ອງເຂົ້າຮ່ວມໂດຍໄດ້ຮັບການຕ້ອນຮັບຢ່າງອົບອຸ່ນຈາກປະທານບໍລິສັດ.


ໃນໂອກາດນີ້ ທ່ານ ສົມຫວັງ ຄູຣູລັດ ຜູ້ອຳນວຍການໃຫຍ່ຂອງບໍລິສັດ ຍອດງື່ມພາວເວີ ມະຫາຊົນ ກໍໄດ້ລາຍງານໃຫ້ຊາບເຖິງການເຄື່ອນໄຫວວ່າ: ໂຮງງານປຸງແຕ່ງນໍ້າມັນເຊື້ອໄຟຍອດງື່ມພາວເວີ ໄດ້ຮັບການສ້າງຕັ້ງຂຶ້ນໃນວັນທີ 1 ພະຈິກ 2021 ດ້ວຍທຶນຈົດທະບຽນ 100 ຕື້ກີບ ໃນຮູບແບບບໍລິສັດຈໍາກັດ ແລະ ໄດ້ປ່ຽນມາເປັນບໍລິສັດມະຫາຊົນ ໃນວັນທີ 10 ມັງກອນ 2023. ພ້ອມເພີ່ມທຶນຈົດທະບຽນ ເປັນ 150ຕື້ກີບ ປະຈຸບັນໂຮງງານສາມາດປຸງແຕ່ງນໍ້າມັນອອກຮັບໃຊ້ສັງຄົມ 10 ລ້ານລິດຕໍ່ເດືອນ ເຊິ່ງນໍ້າມັນທີ່ຜະລິດອອກມາໄດ້ສົ່ງໃຫ້ບໍລິສັດເຊື້ອໄຟລາວຈຳໜ່າຍເປັນສ່ວນໃຫຍ່ ແລະ ບໍລິດສັດຈຳໜ່າຍນໍ້າມັນອື່ນໆອີກຈຳນວນໜຶ່ງ.​

ພ້ອມທັງລາຍງານແຜນການຕໍ່ໜ້າຂອງບໍລິສັດ ເຊິ່ງປະຈຸບັນບໍລິສັດໄດ້ ລົງທຶນສ້າງ ໂຮງງານກັ່ນຕອງ ແລະ ປຸງແຕ່ງນໍ້າມັນເຊື້ອໄຟ ດ້ວຍກຳລັງການຜະລິດ 800 ລ້ານ ລິດຕໍ່ປີ ເຊິ່ງໄດ້ເລີ່ມລົງມືກໍ່ສ້າງມາແຕ່ທ້າຍປີ 2022 ແລະ ຈະສຳເລັດໃນປີ 2023 ແລະ ສາມາດດຳເນີນການຜະລິດໄດ້ໃນປີ 2024 ໃນມູນຄ່າການກໍ່ສ້າງທັງໝົດ 375 ຕື້ກີບ.

ສະຖານທີ່ ຕັ້ງຢູ່ບ້ານ ດິນດຳ ເມືອງໜອງແຮດ ແຂວງຊຽງຂວາງ ໂຮງງານດັ່ງກ່າວຈະເປັນໂຮງງານກັ່ນຕອງ ແລະ ປຸງແຕ່ງນໍ້າມນເຊື້ອໄຟ ເຊິ່ງຈະຜະລິດນໍ້າມັນໄດ້ 3 ຊະນິດຄື: ນໍ້າມັນກະຊວນ, ນໍ້າມັນແອັດຊັງ ແລະ ນໍ້າມັນທາ (Naphtha) ພ້ອມທັງຍົກໃຫ້ເຫັນເຖິງຂໍ້ສະດວກ ແລະ ຂໍ້ຫຍຸ້ງຍາກຂອງບໍລິສັດ.


ໃນໂອກາດນີ້ ທ່ານ ມະໄລທອງ ກົມມະສິດ ລັດຖະມັນຕີກະຊວງອຸດສາຫະກໍາ ແລະ ການຄ້າ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະປະທານບໍລິສັດ ກໍຄືຜູ້ລົງທຶນທີ່ໄດ້ຕັດສິນໃຈສູງນຳເງິນມະຫາສານມາລົງທຶນສ້າງສາພັດທະນາປະເທດຊາດເວົ້າລວມເວົ້າສະເພາະກໍຄືແຂວງຊຽງຂວາງຖືປະກອບສ່ວນອັນສຳຄັນໃນການພັດທະນາເສດຖະກິດສັງຄົມ ຂອງຊາດໂດຍສະເພາະດ້ານພະລັງງານເຊື້ອໄຟເຊິ່ງເປັນສິ່ງສຳຄັນພື້ນຖານໜຶ່ງຂອງການພັດທະນາ ພ້ອມນີ້ກໍໄດ້ຮຽກຮ້ອງໃຫ້ບໍລິສັດຈົ່ງຍຶດໝັ້ນຫຼັກການວິຊາການຢ່າງໜັກແໜ້ນເພື່ອເຮັດໃຫ້ປະຊາຊົນລາວໄດ້ນຳໃຊ້ ນໍ້າມັນເຊື້ອໄຟທີ່ມີຄຸນນະພາບ ພ້ອມນີ້ກໍໄດ້ໄປເບິ່ງສະຖານທີທີ່ຈະກໍ່ສ້າງເປັນໂຮງກັ່ນ ແລະ ປຸງແຕ່ງນໍ້າມັນເຊື້ອໄຟແຫ່ງໃໝ່ຢູ່ບ້ານດິນດຳເມືອງໜອງແຮດຕື່ມອີກ.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.