ອາກາດຈະກັບມາເຢັນລົງອີກໃນທ້າຍອາທິດນີ້ 1-2 ອົງສາ ເນື່ອງຈາກມວນອາກາດໜາວເຢັນທີ່ປະເທດຈີນທີ່ມີກຳລັງປານກາງ ຫາ ແຮງ ຈະແຜ່ລົງມາປົກຄຸມຢູ່ທຸກພາກຂອງປະເທດລາວອີກເທື່ອໃໝ່.
ກົມອຸຕຸນິຍົມ ແລະ ອຸທົກກະສາດ ຄາດຄະເນສະພາບອາກາດ ໃນໄລຍະວັນທີ 20 ຫາ 26 ກຸມພາ 2023 ວ່າ: ໄລຍະວັນທີ 20 ຫາ 26 ກຸມພານີ້ ມວນອາກາດໜາວເຢັນທີ່ປະເທດຈີນທີ່ມີກຳລັງປານກາງ ຫາ ແຮງ ຈະແຜ່ລົງມາປົກຄຸມຢູ່ທຸກພາກຂອງປະເທດລາວອີກເທື່ອໃໝ່, ພ້ອມດຽວກັນກະແສລົມຕາເວັນອອກ-ຕາເວັນອອກສ່ຽງເໜືອພັດ
ປົກຄຸມ ຊຶ່ງຈະເຮັດໃຫ້ອາກາດໜາວເຢັນລົງ 1 ຫາ 2 ອົງສາ ຢູ່ແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ພ້ອມຈະມີລົມພັດແຮງເປັນບາງໂອກາດ. ສຳລັບແຂວງພາກກາງ ແລະ ພາກໃຕ້ ອາກາດເຢັນໃນຕອນກາງຄືນ ຫາ ຕອນເຊົ້າ ແລະ ຈະມີຝົນຕົກຟ້າຮ້ອງ ພ້ອມມີລົມພັດແຮງຢູ່ບາງທ້ອງຖີ່ນ.
